Skautaárið 2025

Sædís Heba Guðmundsdóttir keppti fyrir hönd ÍSS á Vetrarólympíuhátið Evrópuæskunnar, EYOWF.

Keppnisgreinar hátíðarinnar fóru fram á þremur stöðum en listskautarnir fóru fram í Batumi þar sem keppt var í nýju íþróttamannvirki, Batumi Ice Arena, en þetta er í fyrsta sinn sem alþjóðleg keppni í listskautum fer fram í Georgíu.

Sædís Heba fékk í stutta prógramminu 36.58 stig og í frjálsa prógramminu 66.33 stig. Sædísendaði með 102.91 stig í og hafnaði í 23. sætinu á hátíðinni af 30 keppendum.

Halla Björg Sigurþórsdóttir dómari í listskautum var meðal dómara á EYOWF. Hún var ein af átta dómurum sem dæmdi keppni stúlkna á hátíðinni.

Það er mikilvægt fyrir Ísland að eiga dómara með alþjóðleg réttindi og heiður þegar íslenskir dómarar eru valdir til stórra ólympískra verkefna eins og EYOWF.

Visiting Coach Development verkefnið hélt áfram með heimsókn Barbara Luoni í lok maí.

Með henni í för var Ariadna Gupta, ein af skauturum hennar frá Ítalíu.

Frábært þjálfaranámskeið sem skautararnir okkar græða á.

ISU samþykkti nýja stjórnarskrá á aukaþingi sínu (e. 1st Extraordinary Congress) í júlí með 119 atkvæðum á móti 9.

Fulltrúar ÍSS á þinginu voru Svava Hróðný Jónsdóttir, formaður ÍSS, og Halla Björg Sigurþórsdóttir, ISU dómari og alþjóða TC.

Af þessu tilefni var nýtt logo ISU kynnt.

Júlía Sylvía og Manuel hófu nýtt tímabil með þátttöku á Lombardia Trophy. Þar unnu þau sér inn nýtt persónulegt stigamet bæði í stuttu og frjálsu prógrammi og samanlagðri einkunn.

Til þess að vinna sér inn keppnisrétt á stórmóti þarf að vera með sameiginlega tæknieinkunn, á Evrópumót 75.00 stig og á Heimsmeistaramót 91.00 stig.

Parið náði á mótinu 84.68 í heildartæknistig og staðfestu þau keppnisrétt sinn á EM og eru einungis 6.32 stigum frá lágmörkum inn á HM.

Júlía Sylvía og Manuel héldu til Beijing, í Kína, á úrtökumót fyrir Ólympíuleikana. Þar var keppt um síðustu 3 sætin fyrir Ólympíuleikana 2026.  Þetta var síðasta, og eina, tækifærið fyrir þau til þess að tryggja þátttöku á Ólympíuleikunum í paraskautun. Þetta er í fyrsta skipti sem Ísland sendir par til leiks á þetta úrtökumót.

11 pör voru komin til leiks og hafnaði parið í 8 sæti með heildarstig upp á 152.03.

Í Advanced Novice Girls á Haustmóti ÍSS sigraði Elín Katla Sveinbjörnsdóttir með töluverðum mun og fékk hún 66.04 stig fyrir frjálsa prógrammið sem er nýtt Íslandsmet í þessum keppnisflokki. Hún var þá með 106.40 í heildarstig sem er líka nýtt Íslandsmet.

Fyrri metin átti Ísold Fönn Vilhjálmsdóttir og stóðu þau frá árinu 2018.

Halla Björg Sigurþórsdóttir stóðst próf Alþjóðaskautasambandsins til ISU réttinda dómara, fyrst Íslendinga.

Að vera ISU dómari veitir einstaklingum, meðal annars, réttindi til þess að dæma á Evrópumeistaramóti og Heimsmeistaramóti og jafnframt á Ólympíuleikum.

Prófið sjálft er tekið yfir 48 klukkustunda tímabil og reynir mjög á þekkingu, sjálfstæði og kunnáttu dómara.
Undirbúningurinn fyrir prófið er áralangur þar sem ferðast er um allan heim að dæma á hinum ýmsu alþjóðlegu mótum í þeim tilgangi að öðlast reynslu og þekkingu sem þarf.

Það að íslenskur dómari fái þessi réttindi endurspeglar hversu langt íslenska skautaíþróttin hefur náð á ekki svo löngum tíma.

Skautasamband Íslands, í samvinnu við Íshokkísamband Íslands, fer af stað með verkefnið "Hraðasti Skautarinn".

Um er að ræða skemmtilegt verkefni sem gefur möguleika á uppbyggingu og framþróun skautara þvert á greinar.

Sædís Heba tók þátt fyrir hönd ÍSS á Junior Grand Prix mótaröð Alþjóðlega skautasambandsins (ISU) árið 2025.

Sædís keppti á eftirfarandi mótum mótaraðarinnar:

• 20.–23. ágúst í Riga, Lettlandi
• 1.–4. október í Gdansk, Póllandi

Hún ferðaðist ásamt þjálfara sínum, Jana Omelinova og liðsstjórum.
Einnig sendi ÍSS dómara til þátttöku á báðum mótunum.

Úrslit

• Riga: 27. sæti – 99,62 stig
• Gdansk: 30. sæti – 104,69 stig

Sædís bætti árangur sinn á milli móta og sýndi stöðuga framför í sterkri alþjóðlegri samkeppni.

Íslensku skautararnir Elín Katla og Arna Dís tóku þátt í Diamond Spin mótinu í Katowice í Póllandi í október og náðu báðar góðum árangri.

Elín Katla átti stórglæsilegt mót frá upphafi til enda. Hún leiddi eftir stutta prógrammið með 10 stiga forskot og hélt áfram að auka forskotið í frjálsa prógramminu þar sem hún framkvæmdi fjögur þreföld stökk. Nánast allt gekk upp hjá henni og hún tryggði sér öruggan sigur með samtals 109,88 stigum – heilum 32 stigum á undan næsta keppanda.

Úrslit Elínar Kötlu voru ekki aðeins sigur heldur einnig nýtt Íslandsmet, bæði í heildarstigum (109,88) og í frjálsu prógrammi (70,71 stig). Hún átti sjálf fyrri metin sem hún setti á Haustmóti ÍSS 2025.

Þetta voru fyrstu alþjóðlegu verðlaun Elínar Kötlu í Advanced Novice-flokki og stór áfangi í hennar keppnisferli.

Júlía Sylvía Gunnarsdóttir og Manuel Piazza tóku þátt í alþjóðlega skautamótinu Diamond Spin sem fram fór í Katowice í Póllandi í október og unnu mótið með afgerandi hætti.

Parið hlaut alls 140,40 stig í heildina, sem var 13 stigum meira en parið sem hafnaði í öðru sæti. Þetta eru ekki einungis fyrstu gullverðlaun þeirra Júlíu Sylvíu og Manuel, heldur einnig fyrstu gullverðlaun Íslands í paraskautun á alþjóðlegu móti, sögulegur áfangi fyrir íslenskar skautaíþróttir.

Alþjóðlega listskautamótið Northern Lights Trophy fór fram í október í Egilshöll.
Mótið er haldið af Skautasambandi Íslands og listskautadeild Fjölnis, og tókst það afar vel þrátt fyrir að þörf hefði verið fyrir fleiri sjálfboðaliða til að sinna fjölbreyttum verkefnum mótsins.

Mótið er tvískipt; annars vegar alþjóðlegt mót, þar sem keppt er í Advanced Novice, Junior og Senior flokkum, og hins vegar Interclub-mót, þar sem fjölmargir íslenskir skautarar tóku þátt og stóðu sig allir vel.

Ísland átti fjóra keppendur í alþjóðlega hluta mótsins.

Elín Katla sigraði keppnisflokkinn sinn, Advanced Novice Girls, með yfirburðum,19 stigum á undan næsta keppanda.

Elín Katla setti jafnframt nýtt Íslandsmet í bæði stuttu prógrammi, frjálsu prógrammi og í heildarstigum.
Stigin hennar fyrir stutta prógrammið voru 42.26. Fyrra met í stuttu prógrammi átti Ísold Fönn frá árinu 2018.
Stigin hennar fyrir frjálsa prógrammið voru 77.49 og heildarstigin 119.75.

Þetta er í annað sinn á fáeinum vikum sem hún setur nýtt met, en nú bætti hún heildarstigametið um 10 stig.

Þann 28. nóvember bauð Erwin van der Werve, skautahlaupsþjálfari frá Akureyr,i í samvinnu við Styrktarfélag Skautahlaups á Akureyri og Eyjafirði, upp á skautabúðir fyrir skautara og þjálfara í skautahlaupi. Búðirnar fóru fram í Skautahöllinni í Laugardal og voru ókeypis þátttakendum.

Skautahlaup var kynnt áhugasömum og opið öllum. Sérstök fræðsla var fyrir þjálfara en Erwin hefur verið duglegur við að ferðast erlendis til að afla sér frekari þekkingar í þjálfunarfræðum og tækni skautahlaupsins hjá erlendum sérfræðingum bæði í Hollandi og Finnlandi.

Íslandsmeistaramót ÍSS 2025 fór fram í Skautahöllinni í Laugardal

Íslandsmeistarar ÍSS 2025 eru;

Senior Pair:
Júlía Sylvía Gunnarsdóttir & Manuel Piazza

Senior Women:
Lena Rut Ásgeirsdóttir

Advanced Novice Girls:
Elín Katla Sveinbjörnsdóttir

Íslandsmeistaramót í Short Track 2025 fór fram í Skautahöllinni í Laugardal.
Þetta er í annað sinn sem Íslandsmeistaramót er haldið í þessari grein á Íslandi.

Keppt var í Senior og Junior bæði kvenna og karla í þremur vegalengdum; 222m, 500m og 1000m
Einnig var keppt í liðakeppni í tveimur vegalengdum; 500m og 1000m

ÍSÍ kynntu launasjóð íþróttafólks þann 1. desember.

Þetta er í fyrsta sinn sem afreksíþróttafólk á Íslandi fær laun fyrir vinnu sína sem íþróttafólk.

Júlía Sylvía og Manuel eru í hópi fyrsta íþróttafólksins sem fær launagreiðslur.

Stjórn Skautasambands Íslands tilnefndi Sædísi Hebu Guðmundsdóttur sem skautakonu ársins 2025.
Þetta er í fyrsta sinn sem hún hlýtur tilnefningu til Skautakonu ársins.

Sædís hóf árið á keppni á European Youth Olympic Festival (EYOF) þar sem hún endaði í 23.sæti með 102.91 stig.
Síðar á tímabilinu keppti hún á Sonja Heine Trophy og endaði með 109.38 heildarstig og 13. sætið.
Sædís lauk síðan keppnistímabilinu 2024-2025 með trompi á Vormóti ÍSS. Þar hlut hún 44,55 stig í stuttu prógrammi, 74,37 stig fyrir frjálst prógram og 118,92 heildarstig. Þetta var nýtt persónulegt stigamet fyrir Sædísi.

Sædís var fulltrúi Íslands á báðum Junior Grand Prix mótaröðum á tímabilinu 2025-2026.

Sædís keppti næst á Northern Lights Trophy í Egilshöll og endaði, naumlega, í fjórða sæti með 103,53 heildarstig. Með þessum árangri vann hún sér inn 73 stig sem skila henni inn á heimslista fyrir Junior Women í 176 sætið (ISU World Standings - 2025/26 Jr Women). Hún er eini íslenski kvenkyns skautarinn á listanum í dag.

Stjórn Skautasambands Íslands tilnefndi Júlíu Sylvíu Gunnarsdóttur & Manuel Piazza skautapar ársins 2025.

Júlía Sylvía (20) og Manuel (26) eru á sínu öðru tímabili saman í paraskautun.

Parið hóf árið á keppni á Evrópumeistaramóti ISU sem fór fram í Tallinn, Eistlandi, þar sem þau höfnuðu í 18. sæti.

Tímabilið 2025-2026 hófst síðan með trompi á Lombardia Trophy. Næst hélt parið til Beijing á úrtökumót fyrir Ólympíuleikana. Þá tók parið þátt á Diamond Spin í Póllandi. Þar sigruðu þau með 140.40 stig í heildina, sem var 13 stigum hærra en parið sem hafnaði í öðru sæti. Parið tók einnig þátt á Swiss open og hafnaði í 5. sæti með 144.33 stig samanlagt og á Cup of Innsbruck þar sem þau hrepptu bronsið með 154.16 stig.

Með þessari frammistöðu hefur parið tryggt sér 60 sæti á heimslista ISU (ISU World Standings - 2025/26 Pairs).

Júlía og Manúel áttu marga sögulega áfanga fyrir íslenskar skautaíþróttir á þessu ári. Fyrsta íslenska skautaparið til að taka þátt á evrópumeistaramóti, fyrsta parið til að taka þátt á úrtökumóti fyrir Ólympíuleikana og fyrsta parið til að vinna sér til gullverðlauna á alþjóðlegu móti.