Júlía Sylvía og Manuel með gullverðlaun á Diamond Spin

Júlía Sylvía Gunnarsdóttir og Manuel Piazza tóku þátt í alþjóðlega skautamótinu Diamond Spin sem fram fór í Katowice í Póllandi um síðustu helgi og unnu mótið með afgerandi hætti.

Parið hlaut alls 140,40 stig í heildina, sem var 13 stigum meira en parið sem hafnaði í öðru sæti. Þetta eru ekki einungis fyrstu gullverðlaun þeirra Júlíu Sylvíu og Manuel, heldur einnig fyrstu gullverðlaun Íslands í paraskautun á alþjóðlegu móti, sögulegur áfangi fyrir íslenskar skautaíþróttir.

Keppnin í Katowice var liður í undirbúningi parsins fyrir komandi tímabil, en þau hafa verið að sýna stöðuga framför á síðustu mánuðum. Fyrir skömmu kepptu þau á úrtökumóti fyrir Ólympíuleikana í Peking, þar sem þau enduðu í 8. sæti. Parið hefur þegar unnið sér inn keppnisrétt á Evrópumeistaramótinu sem fer fram í Sheffield, Bretlandi, í janúar 2026.

Sigurinn í Katowice staðfestir vaxandi styrk og samkeppnishæfni þeirra á alþjóðavettvangi, og gefur góð fyrirheit fyrir framhaldið.

Næstu mót parsins verða Swiss Iceskating Open í Lausanne, Sviss,  23. - 26. október og svo Cup of Innsbruck í Innsbruck, Austurríki, 13. - 16. nóvember.